Monday, November 28, 2016

....

කවි සිතුවිලි තියෙනවා
මහා හුගක් හිත යට
ඒත් ඇයි ලියන්නේ මම
ඔබ ගැන තව දිගට

ඔබ මහා වදයක් හිතට
කෙළවරක් නැති සිතුවිලි ලග
ඇයි ඔබ ඔහොම නැවතී
බලා හිදින්නේ තවම

ඔබ යා යුතු හිතක් මිස
නැවතිය යුතු හිතක් නොව
එක මොහොතකට වුව

අන්සතු මල් ලග
නැවතිය යුතු නොවන බව
අන්සතු මලකට
පෙම් නොකළ යුතු වග
කවුරුත් කියා දුන්නේ නැද්ද
තවම ඔබට

#AK

...

මම අහන ප්‍රශ්න වලට
ඔබ උත්තර දෙන්නේ
කොහොමද
මටවත් උත්තර නැති කොට

ජිවිතයත් ඒ වගෙයි
අපි එකතු උනොත් දවසක

ප්‍රශ්න වලින් පිරි ගිය
උත්තර නැති වුන
යුධ බිමක් වේවි
අද වාගේම


ඔබ කැමති ද එය ට


Sunday, November 27, 2016

....


මිනිසුන්ගේ කතන්දර ගැන
ඔබ හිතනවා ද මා තරම් ම
ඔබට වුව අදුරු අතීතයක්
ඇති වග ඔවුන් ලියා ඇත
පැරණි කැටපත් පවුරු මත

අතීතයෙන් ජීවිතය ඉගෙන
හෙටක් ඇරඹිය යුතු මුත්
ප්රේමය සරදමක් නොවෙයි
අනංගයෙකුගේ පියාපත් මතින්
තබා නිදහස් කල යුතු වන

කවියකට අකුරු ගලපා
තාලයක රග මුහු කරවා
ලියන්න ලේසියි ප්රේමය ගැන
හිත රැදුන තැන නතර කරවා

නමුත් ජීවිතය නෙවෙයි එහෙම
සීරුවට ගොඩ නැගිය යුතුමයි
හෙමිහිට පෙති දිග හැර
ලොව දකින සියපතක් වාගේම

නොගැලපීම් ඇති තැනක
ගැලපීමක් සොයා කුමට ද
තරු පිරුණු රෑ අහසින්
ඉරබටු තරුවක පහස විතරක් ගෙන
අනග සිතක් පිරි යාවි ද

#AK



වංචාකාරී

විටින් විට අප'තර
යුද්ධ කල වචන මැද
හෙමිහිට ඔබ මට කියූ
ඒ ආදරණිය කතන්දර


හොරැහින් ගෙන මම
ගුලි කෙරුවට කඩදහි අස්සට
කෙදිනක හෝ ඔය හිත
අමනාප වේවිද
මාත් එක්ක..


" හිත අස්සේ තියා ගෙන ඔබ
ඇයි කිව්වේ නැත්තේ මට
ඔබ මට ආදරේ කල වග
ඔබ මහා වංචාකාරියක් මට "


යැයි මුමුනාවී ද ඔබ
දවසක මට


" ආදරේ ගැන ඔබත් දැන උන්නා
යුද්ධ කල වචන අස්සේ
මහා හුගක් ආදරේ තිබුනා
නොදන්නවා වගේ ඈතින් හිද
හිත රවට්ට ගත්ත වංචාකාර හිත
මම නෙවෙයි ඒ ඔබ "


යැයි කියන්නට
මට පුළුවන් වේවි ද එදා ට


#AK




Friday, October 21, 2016

...................


නුඹ පුර හඳක් වුන හින්දා
තරු කැටයක් ලග
මම කවි පදයක් ලිව්වා

ඒ කව නුඹටයි නුඹ දැන ගත් දා
තරු කැටයත් පිනි බිඳුවක් කර
මහා පොලවට විසි කරදා
නුඹ අභිනික්මන් කෙරුවා


Thursday, September 15, 2016

ප්‍රේමය ඔබ මහා විකාරයක්

රිදුම් දෙන සිතුවිල්ලක් ලග
හිත තවමත් අසරණව හිදියි
අකාලයේ උපන් හැගුමක්
වරින් වර විත් සිත රිදවා යයි

ප්‍රේමය නුඹ මහා කටු ඔටුන්නක්
එය දෝතින් ගෙන ආ
ඔහුත් දැන් හිතට හරි වදයක්

ප්‍රේමය නුඹ හැමදාම ඔහොමයි
හිතුවක්කාර හිත
නොසිතිය යුතු තැන් වලම
නවත්තයි

සැරින් සැරේ හිත මත්තට
ඇවිදින් දැන් ඔහු
ප්‍රේමය නුඹ වෙනුවෙන්
මගේ දවසම ඉල්ලයි

ප්‍රේමය,
නුඹ හැමදාමත් ඔහොමයි
නුඹේ හිතුවක්කාරකම් හින්දා
මං ආයෙත් විදවයි

ප්‍රේමය,
ඔබ නම් මහා විකාරයක්
දන්නවද නුඹ මට හැමදාමත්
ගෙනෙන්නෙම දුක් කරදර ගොන්නක්..




- අරුණි කළුපහන

Tuesday, September 13, 2016

දුවගේ කොල්ලා හොයන අම්මලා වෙතයි..

කසාද ගැන කතා කරද්දි නැන්දම්මා ලේලි වලි නම් අද කාලේ අනන්තය. අප්‍රමානය.. බෙලි ගස් වල ඔය හැටි ලාටු හැදෙන්නෙම ඔය නැන්දම්මා ලේලි වලි වල තරම කියන්නය කියලා අපේ අත්තාලා මුත්තලා කතාවට කියන්නේ ද කට කහනවාට නොවේය.

නැන්දම්මලා ලේලිලා වලි ගැන ඇහුනාට අම්මලා දුලාගේ වලි ගැන නම්  අඩුය කියලා කට්ටිය ඔහේ කියෙව්වා ට ඒවා ඉතින් එහෙමමත් නෙවේය  

ලජ්ජා බයක් නැති කෙල්ලට ඊයේ පෙරේදා දවසක පරණ හිතවතියක් සෙට් උනාය. ඒ කෙලිගේ මේ ටික දොහේම ජිවන සටන් පාඨය වෙලා තියෙන්නේ " අනේ අම්මේ මට ඕනේ එයාවමයි " කියන එකය.

හේතු කාරණා හොයාගෙන හොයාගෙන යද්දී අම්මලා දුලාගේ රණ්ඩුවක්ය. වෙන මොකටවත් නෙවේය. විරිදු තාලයක් දාලා කරලා ගත්තා නම්

“ මන් කැමතී කොල්ලාට

අම්මා කැමති නෑනේ...

අම්මා කැමැති කොල්ලාට

කරගහන්න මට බෑනේ ... “

වගේ සීන් එකක් ය.

 අම්මලා ඉතින් කොල්ලාගෙ රස්සාව, තරාතිරම, පරම්පාරාව, ජාතකේ හොයලා පරස්තාව කතා කරාට  දුවලාට ඔව්වා අදාල නැති ය. හිත ගිය තැන මාලිගාව ය.. මාලිගාව ගොඩ නැගුවයින් පස්සෙ දුවලා කවුරුත් ජාතකේ හෙව්වට ඒකත් ඉතින් ඕනාකමටම නොවේය. කොල්ලගේ ජාතකේ ගෙදරට ඉදිරිපත් කරන්න ඕනාවට ය.

කෙල්ල හොයා ගන්න කොල්ලාගේ ක්ලාස් එක අම්මට මදි වෙන්නේ ඔතනදීය. කොහෙන් හෝ ලකුනු කපන එක කපනවාය. අම්මලාට දොසක් කිය්නනත් බැරිය. අම්මලා ලෝකේ  දකින ලෙන්ස් එක දෝනියන්දෑට සැපවත් පික්චර් වල පෙන්වන තාලයේ ජිවිතයක් උරුම කර දීමය.

නමුත් දෝනියන්දලා හොයන්නේ හැන්ඩ්සම් ආදරේ උතුරපු කොල්ලෙක්ය. සල්ලි නැතත් ආදරේ මල්ලක් පිරෙන්න දිය හැකි කොල්ලා අගේය. එහෙම නොවන සල්ලි තියෙන පොස් කොල්ලෙක් හොයන දෝනියන්ද ලා ද නැතිවාම නොවේ.

ලැජ්ජා බයක් නැති කෙල්ලගේ ලෙන්ස් එකට පේන විදියට නම් ලෝකේ කෙල්ලෝ වර්ග තුනකි.

එක වර්ගයක් නම් සල්ලි නැතත් කොල්ලාගෙ මුහුනත් තහඩුව කොහොම උනත් ආදරේ ඉස්මුරුත්තාවට දෙනවා නම් හිත එතැන නවත්තන කෙල්ලෝය.

දෙවෙනි වර්ගයට නම් ඉතින් කොල්ලා අනිත් කෙල්ලන්ගේ ඉරිසියාවට බදුන් කල හැකි තරමෙ හැන්ඩියෙක් විය යුතුය. කෙල්ලව ඇදුම් සාප්පු , පොෂ් පාට අවන්හල් දිගේ රවුම් දෙක තුනක් එක්කන් යන්නට තරම් සල්ලි තිබිය යුතු කොල්ලෙක් විය යුතුය. කොටින්ම කිව්වොත් කොල්ලා හැන්ඩ්සම්, බර අත්තක් විය යුතුය.

මේ දෙකටම අයිති නොවෙන තුන්වන පන්තියේ කෙල්ලන් නම් මීක් ගෑවත් හිස නොඋස්සන පුටුවක් අල්ලන් කියුටස් ගගා නොඉද ගෙදර දොරේ වැඩපල සියල්ල කරන වචනයේ නියමාර්තයෙනම අම්මාගේ හොද දුලා ය. අඩුම තරමේ අම්මාගේ වචනෙට පිටින් පුටුවකින් ඉදගන්නවත් ඔවුන් අකැමතිය.

ඒ කෙල්ලන්ය. අම්මලා ද වර්ග දෙකකි.

පලවෙනි වර්ගය බෑණා පොඩ්ඩ තමන් කැමති ජාතියේ කොල්ලෙක් විය යුතුයි කියලා හිතන අම්මලාය. කොල්ලගේ පෙනුම, පරම්පරාව, ගුණ යහපත්කම, සල්ලි බාගේ සේරම තරාදියට දාලා කිරලා මැනලා සුදුසුකම් සපුරන කොල්ලාට දෝණියන්දා තෑගී කරන අම්මලා ය.

දෙවැනි වර්ගය නම් ආදරයට ආදරය කරන අම්මලා ය. කෙල්ල හොයා ගත්තු කොල්ලා කෙල්ලට හොද නම් කෙල්ලට ආදරේ නම් අම්මටත් කේස් එකක් නැතිය. ඒ අම්මලා කෙල්ලගෙයි කොල්ලගෙයි ආදරේට ඕනා උනොත් බොක්කෙන්ම සපෝර්ට් කරන්න උනත් ලෑස්තිය .

ඔය අම්මලා දෙවර්ගයයි කෙල්ලෝ තෙවර්ගයි ගැන හිතුවාම ලජ්ජා බයක් නැති කෙල්ලට හිතෙන්නේ අනේ කාලේ වනේ වාසේ කියලා ය.

ඒත් ඉතින් පරහකට තියෙන්නේ ඔය කෙල්ලගේ ලව් එකට බකට් දාන අම්මලා කසාද බැන්දයින් පස්සේ දිග කන්නත් කෙල්ලත් එක්ක එනවද කියන එක උඩය. මගුල හොයන්නේ කරලා දෙන්නේ අම්මාය. ඒත් ඒ හොයන බෑණා කළු සුදු නෙවේ අළු චරිතයක් උනත් දිග කන්න වෙන්නේ කඹුරන්න වෙන්නේ දුවට ය. මිනිසුන්ගේ උපන් ගති ටික දිගහැරන්නේ දීගේ කෙරුනායින් පස්සේ කියන්නේ ද නිකමට නොවේය. එහෙව් එකේ අම්මා හොයලා දෙන බෑණා එක්ක දිග කන දුවට දෙයියන්ගේම පිහිටය.

කොල්ලා හොද උනොත් නම් ඉතින් හොදය. එහෙම නොවුනොත් ඉතින් විවාහය ගැන කතා කිරීමෙන් පලක් නැතිය. බටහිට සංස්කෘතිය හැඩ ගැහුණු කොල්ලෝ කෙල්ලෝ නම් කසාද පොතට හිර වී සිටිනවාට වැඩිය වෙනත් සංස්කෘතියක් අනුගමනය කරනවය.

ඒ ලිවින් ටු ගෙදර් සංස්කෘතිය ය.

ලෝකෙට පේන්න කසාදයක් කර ආයෙත් රට්ටුන්ගේ අවලාද මැද කසාදෙ කටු ගානවට වැඩිය දෙන්නෙක් කලක් ආශ්‍රය කරන්නට එක වහලයක් යටට වෙන එක හොදය. ඔවුන් කියන්නේ එහෙමය. ඉන් අනතුරුව එක්කෝ දීගේ කෙරෙනවාය. නැත්තම් දෙන්නා දෙපැත්තකට වෙනවා ය.


ඕක ඉතින් අපේ වැඩිහිටි පරම්පරාවට දිරවන්නේම නැති වීම ම වෙනම කතාවකි. ඒත් ඉතින් ඒ කාලෙත් අපේ ඔය කියන මහා ප්රෞඩ ඉතිහාසය තුල ලිවින් ටුගෙදර් සංස්කෘතියම තිබුනේ ය. ඒ කාලේ එහෙම නමක් භාවිතා නොකලාට හිත ගිය කෙල්ලව අරන් පැදුරු පෑගුවයින් පස්සේ එක පැලක් අටවාගෙන දරු මල්ලෝ හදන්නේ ද ඉතින් ඔය කියන කසාද පොතක තියා කඩදහි කොලයකවත් සලකුණු නොකරය. ඕවාත් ලිවින් ටුගෙදර් මය.

මෑත කාලින ඉතිහාසයේ නම් කසාද ගෑනි ගෙදර ඉද්දි වෙන වෙන ඈයෝත් එක්ක වෙනම ලිවින් ටුගෙදර වෙන්න දිගින් දරු මල්ලොත් හදපු උදවිය ඈත ගම් වල විතරක් නොවේය. ප්‍රසිද්ධ වේදිකාවේ පවා ඉන්නවා ය. අදටත් ඔවුන්ගේ දරුවන්ගේ උප්පැන්නේ මව්පියන් අවිවාහකය.

පෙරදිග උදවියට ඕවා මැජික් උනාට බටහිර සංස්කෘතියට නම් ඕවා සිම්පල් කතාය. ඕවා කැපිටල් කරගන්නට යන්නේ ද ඉතින් අපේ උදවිය විහින්මය. බටහිර ලෝකේ සුද්දා අනුන්ගේ කුණු තමන්ගේ ඔලුව උඩින් තියා නොගත්තාට අපේ උදවිය අනෙකාගේ කුණු බැරල් පිටින් ඔලුව උඩ තියාගන්න එක ඔය සේරටම මුලය.

මයි කාර් නම්, මයි පාකින් නම්,  කොහෙන් පෙට්‍රල් ගැහුවාත් කාටවත් මොකද කියලා කවුරු කවුරුත් හිතුවා නම් ඔය ප්‍රශ්න සේරම නතින් ය.







-          අරුණි කළුපහන -