Wednesday, April 8, 2015

සැබෑ නොවෙනා හීන හරි මිහිරියි


වැස්ස පෙම්වතුන්ට  ආශීර්වාදයක්  කියලා  කවුදෝ  කියලා තිබුණා. ඒ නිසාම  වෙන්න ඇති පෙම්වත් හිත් මේ තරම් වැස්සට ආදරේ කරන්නේ..

ඒ කොහොම වුනත් හිරිකඩ හිතල සුළගයි  මන්දාරම්  අදුරයි එක්ක ලහි ලහියේ වෙල් යාය දිගේ  ඈතින් එන වැහි කෝඩයට ආදරේ නොකරන්නේ කවුද ??

මේ දවස්වල හවසට කෝච්චියේ ගෙදර යනකොට මරදානට මහ වැස්ස වුනාට  මුතුරාජවෙල දිහාවේ පහු කරද්දී  මුතුරාජවෙලට ලං වෙන වැසි අදුර අපුරුවට අහස පුරා සිත්තම් වෙනවා. කෝච්චිය නොයා මුතුරාජවෙල ගාවින් නවත්තගෙන ඉන්නවා නම් කියලා හිතෙන්න තරම් ඒ දසුන හරිම අපුර්වයි.

කෝච්චියේ ජනේලට කම්මුලත් හේත්තු කරගෙන ඒ දිහාවේ බලන් එද්දී මට මතක් වුනේ ඔහුව.

හිමි නොවෙන බව දැන දැනත් මගේ හිත මාවත්  ඇදගෙන ගිහින් නතර කරන්නේ ඔහු ගාව. ඒ ලෙන්ගතුකමට  ආදරය කියලා අරුත් දෙන්න මට බැහැ. හැබැයි එහෙම නොවෙයි කියන්නත් මට බැහැ. මං දන්නා එකම දේ ඔහු හැබෑ නොවෙන හීනයක් කියන එක. එහෙමයි කියලා ඔහුට තියෙන ලෙන්ගතු හිත අමතක කරන්නත් මට බැහැ,

හැමදාම හමුවන හොදටෝම ආඩම්බර හැබැයි ටිකක් සැර චරිතයක්. මටත් නොදැනීම ඔහු ලග හිත නතර වෙන්න තරම් අපුරු පෞර්ශයක් ඔහු ලග තිබුණා. ඒ සේරටම වැඩිය කතා කරන ඇස් දෙකක්..

කඩවසම් පෙනුමයි කතා කරන ඇස් ලගයි නතර නොවෙන ගැහැණු හිතක් තියේවි ද ??

නින්ද අහිමි රාත්‍රීන්ට දෙසවන් ලග තනි රකින්නේ කසුන් කල්හාරගේ ගීත..

කසුන්ගේ ගැඹුරු කටහඩින් භාවාත්මක තනුවක් එක්ක ගැයෙන සැබෑ නොවෙනා හීන හරි මිහිරියි ගීතය අහන වාරයක් පාසා නෙත් කොනට කදුලක් උනන්නේ ඔහු මට හිමි නොවෙන බව දැනෙන නිසා ද නැත්තම් කසුන් හරියටම මගේ හැගුම් ගයනා නිසා ද කියන ඒක මං තාමත් හිතනවා.

සැබෑ නොවෙනා හීන හරි මිහිරියි
ක්ෂිතිජයක් සේ රවටලා සිත
සිතින් විතරන් එක්වෙලා
අතීතය දෝතට අරන් අපි
අහස් ගඟටම විසි කළා
සැබෑ නොවෙනා හීන හරි මිහිරියි

උදේට දුම්රියේ දී නෙත ගැටෙනා ඔහු හමුවුණු දවස් මතක තියා ගන්න නිල් පෑනෙන් දිනේ ලකුණු කරගත්තු දුම්රිය ටිකට් ගොඩක් එකතු කරන්න තරම් ඒ හැගීම බොලද බව මං දන්නවා. ඔහු නාව දවස් වලට දුම්රිය ටිකට් ඔහේ විසික් වෙනවා. 

ඒ සිතුවිලි බොලද වුනත් ඒ සිතුවිලි මාව ජිවත් කරවන හැටි මට දැනෙනවා. නමුත් ඔහු අන්සතු වස්තුවක්. අනිත් අයගේ කතා බහින් මට තේරෙන තරුණිය ඔහුගේ ජිවිතයේ වර්තමානය ද අතීතය ද කියන්න මං දන්නේ නැහැ. ඒ ගැන සොයලා හිත රිද්දගන්නේ මොට ද ?? 

රාත්‍රියේ සිහිනෙන් ලග උන්නාට ආලවන්ත කතා ගෙතුවට උදේට ඇස ලග ඉන්න හීනේ එයිට වෙනස්.. පුංචිම පුංචි වෙලාවක් ලගින් ඉදිවී. එත් හැමදාම නෙවේ. ඇස් වලින් නම් ඕනේ තරම් දොඩමලු වේවි. බහින්න ලං වුනාම වචනයක් දෙකක් කියාවි. හැබැයි ඒ වචනේ දෙකම දවස පුරාම මේ සිත සතුටින් තියෙන බව ඔහුත් නොදන්නවා ඇති.

හිමි  නොවෙන බව දැන දැනත් අහස උසට පෙරුම් පුරන්න.. වචනෙකින් දෙකකින් සතුටු වෙන්න..  ප්‍රේමයේ විල් තෙර අභියස යෞවන සිතක නැගෙන හැගුමන් හරි පුදුමයි.

එදා අප පියමං කරපු මග
වියෝවක ගී ඉතිරි වී ඇත
එපා සුළඟේ අරන් යන්නට
ඔහේ තිබුණාදෙන්
සැබෑ නොවෙනා හීන හරි මිහිරියි

පහන නිවුනත් පහන් පැල මත
ඒ සුවඳ තාමත් රැඳී ඇත
එපා සුළඟේ අරන් යන්නට
ඔහේ තිබුණාදෙන්
සැබෑ නොවෙනා හීන හරි මිහිරියි

16 comments:

  1. උත්සහා කරා නම් ලබා ගන්න ආඩු ගානේ, ඒ මතකය හරි හිතේ තියෙව් කවදා හරි සතුටු වෙන්න.. අත්දැකීම් මතකයන් කියන දේවල් හරිම සුන්දර දේවල් මොණරි. පළපුරුද්දෙන් කියන්නේ.. උත්සහා කරලා බලන්න

    ReplyDelete
    Replies
    1. අන්සතු දෙයක් ලබා ගන්නේ කොහොමද ?? තව හිතක් අඩවන්නේ කොහොමද ඒක සතුටක් වෙනුවෙන් :(

      ඇත්ත ඒ මතකයම ඇති හිත ජිවිත කාලෙම සතුටින් තියන්න..

      Delete
  2. මමත් කැමතිම සින්දුවක්, ඒත් පුරුදුම රිදෙන සිතුවිල්ලක් :(

    ReplyDelete
    Replies
    1. හ්ම්ම්ම්.. ඔබට ඒ සිතුවිල්ල දැනෙනවා කියන්නේ මගේ ලිවිම සාර්ථකයි.. ස්තුතියි :)

      Delete
    2. ඔව් ඔබේ ලිවීම සාර්ථකයි

      Delete
  3. මට මතක් වුණේ මන්දාරම් අඳුර මැදින් සින්දුව....

    ReplyDelete
    Replies
    1. ඒ සින්දුව මොකක්ද ?? මන් අහලා නැහැ නේ

      Delete
    2. https://www.youtube.com/watch?v=vJyxhz0IK88

      Delete
  4. මේ සිංදුව මම අහලා නෑනේ..

    හීන හැම එකක්ම සැබෑ වෙන්නේ නෑ.. ඒත් අපිට හීනය කිට්ටුවට හරි යන්න පුළුවන්නම් අන්න ඒක සතුටක්..

    ReplyDelete
  5. ඔයාගේ සටහන මේ සින්දුවට ලොකු ආලෝකයක් එකතුකරලා. අපූරුයි මොණරි!

    ReplyDelete
    Replies
    1. සින්දුවේ ලින්ක් එකත් දැම්මනම් පෝස්ට් එක සර්ව සම්පූර්ණයි. :)

      Delete
  6. මිහිරි හීන යතර්ථයක් කර ගන්න පුළුවන් නම්.

    ReplyDelete
  7. අැත්තට ම මේ සින්දුවේ ලින්කුවක් දෙන්නකෝ...

    ReplyDelete
  8. ඒක පට්ට සින්දුව ‍නේද??

    http://www.ananmanan.lk/free-sinhala-mp3/song/5821/saba-nowena-heena-kasun-kalhara-sinhala-mp3.html

    ReplyDelete
  9. This comment has been removed by the author.

    ReplyDelete