Friday, July 3, 2015

දැක්ක ගමන් හිත බැඳුණා


සාමාන්‍යයෙන් දැන් කාලේ ක්‍රෂ් එකක් නොතිබ්බ කෙල්ලෙක් කොල්ලෙක් හොයා ගැනීම කළුනික හොයා ගැනීමටත් වැඩිය අමාරුය. එක්කෝ මම එයාට ක්‍රෂ්ය, නැත්නම් එයා මට ක්‍රෂ්ය. මීට අවුරුදු හය හතකට කලින් නම් තමන්ගේ ක්‍රෂ් එකේ ෆොටෝ කෑල්ලක් හොයාගෙන බලන ගමන් හීන මව මවා උන්නේය. ක්‍රෂ් එක ප්‍රසිද්ධ චරිතයක් නම් පුවත්පත්වල පළවෙන ලිපි කප කපා පොත් හදන්නට තරම් ක්‍රෂ් එක කෙරෙහි ප්‍රේමය බලවත්ය.

ඊට අවුරුදු දෙක තුනකට පස්සේ සකර්බර්ග් කොළුවා ෆේස්බුක් ගෙන ආවේය. ඇඳ ඉස්සරහ බිත්තියේ රජ කළ ක්‍රෂ් එකේ ෆොටෝව මුහුණු පොතට ආවේ ඉන් අනතුරුවය. මුහුණු පොත හෙවත් ෆේස්බුක් පීර පීරා ක්‍රෂ් එක සොයාගෙන ටඡ රික්වෙස්ට් එකක් යවා ගන්නකම් සමහරුන්ට නින්ද යන්නේ නම් නැත. ඊට දෙතුන් දිනකට පස්සේ ක්‍රෂ් එක සමඟින් චැට් කරන්නටද කලාතුරකින් පින පෑදෙනවාය. එතැනින් එහාට නම් ඉතින් කොළඹ ඉඳන් යාපනේට ගියත් තත්පරෙන් තත්පරේට ක්‍රෂ් එක දැනුවත් කරන්නට තරම් ක්‍රෂ් ප්‍රේමය බලවත්ය.

අපිද ඔය අවධිය එක් කලෙක පසු කළෙමු. එකල අපේ ක්‍රෂ් එක වෙලා වුන් පත්තරවල ලස්සන ලස්සන කවි සින්දු ලියන්නෝ අද අපිට අල්ලපු මේසයේම ඉද්දි ඉතින් වෙලාවකට අපිටම හිනාය. හැබැයි ඔය මොන ක්‍රෂ් එක තිබ්බත් ඔය ක්‍රෂ් සෙනෙහසේ පැවැත්ම බත් මුට්ටිය ඉදෙන්න යන කාලයටත් අඩුය සහ අලුත් ක්‍රෂ් එකක් හමුවෙනතුරු පමණය. ඒක ඉතින් ඒවායේ හැටිය. ඉඳලා හිටලා තමන්ගේ ක්‍රෂ් එකක් සමඟින් පෝරු මස්තකයට නඟින්නෝද නැතුවා නොවේ.


මේ දිනවල අන්තර්ජාලය හරහා ලංකාවේ ප්‍රසිද්ධ චරිතයන්ගේ අපූරු නිර්වචන ටිකක් සහිත වීඩියෝ වගයක් හුවමාරු වෙනවාය. ඔවුන්ගේ මාතෘකාවට භාජන වී ඇත්තේ "දැක්ක ගමන් ආදරයක් ඇති වෙන්න පුළුවන්ද?" කියලාය. ඒ අෑයින්ගේ සමහරුන් නම් එකහෙලාම කියන්නේ දැක්ක ගමන් ඇතිවෙන ආදරයක් නෑය. ඇතිවෙන්නේ ක්‍රෂ් එකක් විතරයි කියාය. තවත් අයෙක් නම් පළමු හමුවීමෙන් ඇතිවන ක්‍රෂ් ප්‍රේමයන්හි සුන්දරත්වයද සිහිපත් කරමින් තමන්ට ක්‍රෂ් එකකින් ගොඩයා හැකි ආදරයක් නොලැබීම ගැන දුක් වෙනවාය. ඒ අතරේ තවත් ප්‍රසිද්ධ ගෑනු දරුවෙක් මෙහෙමත් කීවාය.


"මට කෙනෙක් ගැන ක්‍රෂ් එකක් ඇති වුණොතින් මං ගිහින් ඒ කෙනාට කියනවා, මම ඔයාට ආදරෙයි කියලා. ඕනේ උත්තරයක් භාර ගන්නවා. ගිහින් කියලා ප්‍රතික්ෂේප වුණත් කමක් නැහැ. හිතේ තියාගෙන දුක් විඳිනවට වැඩිය..."


කතා නම් මසුරන්ය. ඒත් ඉතින් අපේ පුංචි ලංකාවේ කෙල්ලෝ කොල්ලෙක්ගෙන් ආදරේ ඉල්ලන්නට යෑමද එතරම් ප්‍රායෝගික නැත. හැබැයි ඉතින් මුලින්ම කොල්ලාගෙන් ගිහින් අහන කෙල්ලෝද ලංකාවේ නැතිවා නොවේ. ඒ වගේ වෙලාවට එක්කෝ කොල්ලා තක්බීර් වෙච්ච රන්බීර් වගේ බලාගෙන ඉඳලා සමහර විට පැනලා දුවන්නත් ඉඩ තියෙනවාය. සමහර විටක නම් කොල්ලා කට කනේ තියාගෙන හා කියලා ප්‍රේම වසන්තයකටත් මුල පුරනවාය. හැබැයි ඒ කෙල්ල කසාද බඳින්න නම් කොලුවාගේ ඔළුවේ හීනයකවත් අදහසක් නැතිවාට සැකයක් නැත.


අයි-ෆෝන් යුගයක ජීවත් වුණද අපේ රටේ කොල්ලෝ තාමත් ඔළුවලින් සිහින දකින්නේ එක්දහස් නවසිය බර ගණන්වල හිඳය. ඔවුන් පාර දිගේ අතින් අල්ලන් යන්න, පඳුරු අස්සේ පෙම් කරන්නට සොයනා කෙල්ල රැගෙන විවාහයකට යන්නේ නැතිය. වර්තමානයේ සිටිනුයේ චරිතවත් ගුණවත් තමන්ගේ දරුවන්ට අම්මා විය හැකි කෙල්ලක සොයනා බහුතරයකි. ඉතින් තමන්ගේ පියවර සහ කට ඉස්සර කරගන්නේ නැතිව කොල්ලගේ හිතේ ඔය කියනා ප්‍රේමය ඇති වන තුරු බලා හිඳීම හොඳම තීරණය වනවාට නිසැකය. නැත්නම් ඉතින් කොහේ හෝ තැනකදී කෙල්ලට "ලැජ්ජා බයක් නැති කෙල්ලෙක්" කියන කාර්ඩ් එක වැදෙන්නට බැරි නැත. සමහරු නම් ඉතින් ලෝකයාට පෙන්න ක්‍රෂ් කියන්නේ මැජික් වගේ පෙන්නගෙන ඉන්නවාය. ඒ අෑයින්ටත් ඉතින් පුංචි පරිමාණයේ ක්‍රෂ් හෝ තිබී ඇතුවාට සැක නැත.

ලංකාවේ පමණක් නොව ලෝකයේ ද ක්‍රෂ් නිසා ඇතිවූ ප්‍රේම කතා බහුලය. සමහරක් ප්‍රසිද්ධ චරිත ගොඩ යන්නේ ඔය ක්‍රෂ් නිසා ඇති වන පෙම් පලහිලව්වලින්ය.


ලෝකයේ බහුතරයක් පවුල් කැඩෙන්නට හේතුව පිටුපස ඇත්තේ ඉතින් ඔය ක්‍රෂ් එකක් නිසා ඇති වෙච්ච ප්‍රේම කතාන්දරය. හොලිවුඩයට බොලිවුඩයට පමණක් නොව කොයි කාටත් ඕවා පොදුය. මටත් ඉතින් එක්තරා ක්‍රෂ් ඉතිහාසයක් තිබුණේය. ඒ ක්‍රෂ් පුරාණය ඇරැඹෙන්නේ ශිෂ්‍යත්වයට ලියනා කාලයටත් කලින්ය. ඒ කාලයේ එංගලන්තයේ ඔටුන්න හිමි කුමාරයා වෙන්න හිටිය විලියම් ගැන තිබ්බ ක්‍රෂ් ප්‍රේමය නිසාවටම පිටු 400 පොත් හතරක් පහක්ම පිරෙව්වේ ආදරණීය විලියම් නමිනි. ඒ ප්‍රේමය විලියම්-කේට් එක්ක පලහිලව්වක් පටන් ගන්නා තුරුම තිබ්බේය. ඒක එතැනින් ඉවරයි. වත්මන් ක්‍රෂ් එක ගැන නම් පත්තරේකට ලියන්නට බැරිය. ලිව්වොතින් සමාජයට මුහුණ දෙන්නට වෙන්නෙත් නැත. අන්තිමට ඒ ක්‍රෂ් එක විවාහ කර ගන්නට සිදු වුණොතින් වෙන්නේ සිය දිවි නසා ගන්නටය. ඒ කොහොම වුණත් ඔය ක්‍රෂ් ප්‍රේම කතන්දර කොයි තරම් කල් පවතීද යන්න නම් දන්නේ දෙවියෝ ම පමණකි. ඕවා ඉතින් සුන්දර සිහින ලෝකවලට පමණක් සීමා වූ ක්‍රෂ්ය.


ඉතින් ක්‍රෂ් විවිධාකාරය. තමන්ට ක්‍රෂ් වූ අයෙක් සිටීම හෝ කා ගැන හෝ ක්‍රෂ් එකක් ඇති වීම මහා ලොකු දෙයක් නොවෙයි. ක්‍රෂ් එකක් සිටීම ලැජ්ජා බයක් නැති වීමකුත් නොවේය. කෙල්ලෝ ක්‍රෂ් වුණාට කමක් නැත. ක්‍රෂ් හමුවන්නට යෑම නරකය. ක්‍රෂ්වලට මුලින්ම ආදරය ප්‍රකාශ කරන්නට යෑමද නුවණට හුරු නැත. ක්‍රෂ් එක සදාකාලික වුවද නොවුවද ක්‍රෂ් එකට පාඩුවේ සිටින්නට ඉඩදී කාලය එනතුරු බලා සිටිය යුතුය.

ක්‍රෂ් එක හමුවෙන්නට යෑම නම් ක්‍රෂ්, ක්‍රෑෂ් වීමට මඟකි. කෙල්ලනි, ක්‍රෂ් බලන්නට යෑම එක පියවරක් පමණි. එතැනින් එහාට පියවර ගනින්නට ගියොතින් නම් ඉතින් ඒ ගැන කතා නොකරන තරමට හොඳය.

අරුණි කළුපහන


7 comments:

  1. අනේ ඉතින් අපි නම් හොද ළමයි!!! ඔය වගේ මගුල් නම් අපි නැටුවේ නෑ....හැමදාම හොදම ළමයි විදියට හිටියා විතරයි!!

    ReplyDelete
    Replies
    1. අම්මපා :D ඔය කියන අයගේ කෙරුවාවල් ඉතින් ඊට හපන් ඇති !!!

      Delete
  2. ක්‍රෂ් ක්‍රෑෂ් වෙන එක ගැන ඉවාන් කාලෙකට කලින් ලියපු එකක් මතක් උනා. කවුද මේ මොණරි කියල අදනේ හොයා ගත්තේ..

    ReplyDelete
    Replies
    1. අහ එහෙම ද කියවලා බලන්න ඕනි :)

      දැන් දන්නවනේ ;)

      Delete
  3. සුපිරියි මොණරියෝ!!

    ReplyDelete
    Replies
    1. ස්තුතියි බස්සියේ :)

      Delete
    2. ආව් අම්ම...
      මොනරුයි බස්සොයි...
      හරි සෝයි..

      Delete